Abogado, tinambangan sa QC; Suspek na pulis, patay

Tinambangan ang isang abogado ng 3 lalaki na sakay ng 2 motorsiklo sa northbound ng EDSA sa Quezon City Martes ng madaling araw.
Hindi naman nasaktan si Atty. Arjel Cabatbat.
Ngunit isa sa mga suspek na kinilalang si PO1 Mark Ayeras ng Northern Police District ay binawian ng buhay sa engkwentro.
Batay sa inisyal na imbestigasyon, pakanan ng East Ave. ang SUV lulan si Cabatbat nang tabihan ng mga suspek at paputukan alas-12:30 a.m.
Hinabol ng SUV ang mga motorsiklo habang nakikipagpalitan ng putok ang mga kasamahan ng abogado.
Pagbaba ng flyover sa Quezon Ave., magkasunod na sinagasaan ng SUV ang 2 motorsiklo.
Nawalan naman ng balanse ang SUV at tumagilid.
Ang 2 sakay ng motorsiklo ay itinakbo sa East Avenue Medical Center kung saan binawian ng buhay si Ayeras.
Hindi naman matagpuan ang isa pang suspek na sakay ng motorsiklo na pinaniniwalaang sugatan din.
Hinahanap pa rin ang iba pang kasamahan ni Cabatbat.
Ilang basyo ng kalibre .45 na baril at 9mm ang natagpuan sa crime scene.
Ayon kay Chief Supt. Guillermo Eleazar, director ng Quezon City Police District, marami umanong banta sa buhay si Cabatbat.
Kabilang na umano rito ang galing sa isang doktor na nakasuhan at napatanggal niya sa trabaho.

Source:

SHARE YOUR OPINION ABOUT THIS ISSUE?